من 10 سنين
كان لما حد يتكلم عن النت يقول
متشتريش من النت
متتجوزش من النت
متثقش ف حاجة اتقالت ع النت
صح ؟

ايه اللي حصل ف ال 10 سنين دول خلاك
تشتري من النت
وتتجوز من النت
وتثق ف النت ؟
اللي حصل هو تغيير الفكر والفعل
الفعل اتغير بان النت بقا محل ثقة
والثقة دي ناتجة عن تجاربك
ولما جربت ووثقت
اتغير فكرك
قيس كل حاجة انت خايف منها النهاردة بنفس المقاييس اللي فاتت دي
هتعرف انك ف المستقبل مش هتخاف منها
بالعكس
ده انت مش هتثق غير فيها
واللي حاصل
انك لما تيجي تقدم على وظيفة في شركة ما مثلا
اول حاجة بتعملها
بتخش ع "النت" تعرف معلومات عنها
انا شخصيا بعمل كدة من 15 سنة

مثال
شركة توظيف جابتلي شغل ف ليبيا من 15 سنة وشوية
كانت شركة عصاير
خدت اسم الشركة ورحت لعم جوجل
وقولتله يا عم جوجل انت تعرف حاجة عن الشركة الفلانية اللي ف ليبيا ؟
قالي اه
خد الكام مقالة على خبر دول عنها
دخلت لقيتها شركة عاملة مشاكل
فرفضت العرض ومرضتش اسافر
واحد صاحبي قالي انا هغامر واسافر
بعد سفره بيومين
اتصل باخوه وقاله ابعتلي فلوس انا عايز ارجع انا ف عذاب من ساعة ما وصلت
لا سكن عدل ومعاملة مش كويسة
لما رجع وقابلته
قلتله انا مش قلتلك بلاش انا جبت معلومات عن الشركة وطلعت مش تمام
قالي عندك حق
يبقى لازم تعرف ان اللي موجود على ارض الواقع ملموس
بقا موجود ع النت كمعلومات
خد فكرة من النت وحطها ف دماغك
وقارنها باللي بيحصل على الواقع
وانا واثق ان 99 % من معلومات النت هتطلع صح
لان حتى الاشاعة والكدبة
لها اصول وجذور واسباب
حبيت اشارككم خبرتي المتواضعة ف المقارنة بين عالم النت وعالم الواقع
دمتم بخير
متنساش شير وعرف غيرك
يمكن هو محتاج يعرف المعلومة دي